உடையாத நம்பிக்கை…

 

ஒரு கண்ணாடிக் குடுவையைப் போல
நம் காதலை பத்திரமாய் உன்னை
பார்த்துக் கொள்ள சொல்கிறேன்.. 

நீயோ உனது செல்ல இம்சைகளால்
அதை எப்போதுமே பந்தாடுகிறாய்.. 

எக்கணத்திலும் அது உடையாது எனும்
பெருத்த நம்பிக்கையுடன்…

.

இன்று – 23 / 05 / 2010

 

 

எனது பாடல்களோடு “ஜெயமுண்டு பயமில்லை…” திரைப்படத்தின் பாடல்கள் வெளியீட்டு விழா..

.

மொட்டைமாடிப் பூ…

 

ஒரு மஞ்சள் மாலைப் பொழுதில்
மொட்டைமாடிக் கட்டைச் சுவற்றில் அமர்ந்து
சூரியனைக் காணாது முனை கவிழ்ந்த
சூரியகாந்திப் பூவைப்போல
தலை குனிந்து படித்துக் கொண்டிருக்கிறாய் நீ..

எதிர்மாடியில் படிப்பதாய்
நடித்துக்கொண்டிருக்கிறேன் நான்
உன் முகமலர்தலுக்கான சூரிய வெளிச்சமாய்…

.

நிலாச்சோறு…

 

தாயின் இடுப்பில் இருந்தபடி
வாய் நிறைய உணவோடு
பிஞ்சுக் கைகளை அசைத்து அசைத்து
அந்தக் குழந்தை
அம்மா சொன்னதைக் கேட்டுக் கேட்டு
அப்படியே திருப்பிச் சொல்லி
ஆசை ஆசையாய் அத்தனை முறை அழைத்தும்
வரவே இல்லை அந்த நிலவு..

அதனால் என்ன..
இன்று நிலைவை அழைத்து அசையும் கை..
நாளை நிலவில் நின்று கையசைக்கும் !

.

அடுப்படிப்பணம்…

 

அஞ்சறைப்பெட்டிக்குள்ளும்.. அரிசிப்பானைக்குள்ளும்..
அடுக்கி வைத்த டப்பாக்களுக்குள்ளுமென
அடுப்படியில் அங்கங்கே யாருக்கும் தெரியாமல்
ஒளித்து வைத்து ஒளித்து வைத்து
பல ஆண்டுகளாய் சேமித்து வைத்த
மொத்தப் பணத்தையும்
ஆசையாய் கொண்டுவந்து கொடுத்தாள் அம்மா..

காதலிக்கு பரிசளிப்பதற்க்காக
வேலைக்கு பணம் கட்ட வேண்டுமென சொன்ன
மகனின் ஒற்றைப் பொய்க்காக…

.